وبعدييييين… الرز مش راضي يستوي

عذرا منكم يا جماعة هادي أول مرة بكتب فيها بالعربي و طلعت عيني و أنا بدور على الأحرف بس جد هاد ما بزبط ينكتب إلا هيك

يعني عن جد أنا مش فاهمه… كله رز!!! شو الإختراع فيه ؟ إنقعي رز، شوية زيت بالطنجرة، حطي الرز، إغمري مي ( بس بلاش مي)، و لما يغلي غطيه، صعبة؟؟؟

مافي فايده، إنو يزبط معي من أول مرة و يطلع رز طبيعي، أبدا ، مع إنو جد المفروض يكون أهون شي ينطبخ، (هلأ ستي لو تعرف بتقولك: لأنك مش معدلة، اللي رزها مش زابط معناها مش معدلة).

يعني أنا من زمان حكيت ، أنا لا إلي في الطبيخ ولا في المطبخ، بس يا  جماعة  الخير، هادا رز، مو صاروووخ!!!

يعني جربت أطبخ الطبيخ اللي عن جد هادا، فاصولية و ملوخية و الأشياء هادي، يعني ما طلعت فظيعة، بس طعمه أكل، إلا الرز.. بياخد معي ساعة لحتى يستوي، فرصة سعيدة إنو مش طابخة خروف أنا.

أنا أقصاها في المطبخ بعمل سندويشات، بقلي بيض، و لما تطبش، بعمل معكرونة، و على هيك كتر ألف خيري، وبزيادة كمان.

مش عارفة، بفكر أصير أشتري رز مطبوخ جاهز لحد ما ترجع ماما، لكان بدي أضل أكب رز؟ والله شغلة هادي.

 بالإذن بدي أروح أشوف المفاعل النووي اللي على النار.    دعواتكم ما تنكب الطنجرة كمان مرة.

Filed under: Personal